Post-Tensioning နည်းစနစ်အကြောင်းသိကောင်းစရာ (၃)

၎။ အရေးကြီးတဲ့၊ သတိပြုရမယ့် အစိတ်အပိုင်းများ
Post-tensioning system မှာ အရေးပါတဲ့၊ သတိပြုရမယ့် အစိတ်အပိုင်းတွေများစွာရှိပါတယ်။ Unbonded နည်းမှာဆိုရင် plastic sheathing က ကွန်ကရစ်နဲ့ ကြိုးတွေကြားမှာ bond breaker သဘောမျိုး ဖြစ်နေပါတယ်။ ဒါပေမယ့် သူက ကြိုးတွေကို သယ်ယူတဲ့အခါမှာ၊ တပ်ဆင်တဲ့အခါမှာတော့ အလွယ်တကူမပျက်စီးနိုင်အောင် အကာအကွယ်ပေးပါတယ်။ နောက်ပြီး ကြိုးတွေကို ရေငွေ့နဲ့ အခြားသော chemical တွေ တိုက်ရိုက်ထိတွေ့ခြင်း၊ သံချေးတက်ခြင်း စတာတွေကနေ အကာအကွယ်ပေးပါတယ်။
နောက်တစ်ခုကတော့ အရေးကြီးတာက ကြိုးထိပ်တွေမှာ တပ်ရတဲ့ anchorage ခေါင်းအိမ်လေးတွေပါပဲ။ အထူးသဖြင့် unbounded နည်းမှာ ဂရုစိုက်ရပါတယ်။ PT ကြိုးတွေ တပ်ဆင်မယ် ကွန်ကရစ်လောင်းမယ်၊ ပြီးရင် လိုအပ်တဲ့ ကွန်ကရစ်ခံနိုင်အားရတဲ့အခါမှာ wedge လို့ခေါ်တဲ့
နှစ်ဖက်ညှပ်ချုပ်ခေါင်းလေးတွေတပ်မယ် ပြီးရင် ကြိုးတွေကို Hydraulic Jack နဲ့ ဆွဲဆန့်လိုက်မယ်။ အဲ့ဒီအခါမှာ Jack ကနေ ကြိုးကို လွှတ်လိုက်တဲ့အခါ ကြိုးကနောက်ကို အနည်းငယ်ပြန်ရုန်းတော့ ချုပ်ခေါင်းလေးကိုပါ ဆွဲရုန်းပါတယ်။ ချုပ်ခေါင်းကလည်း ကြိုးကို နောက်ပြန်မရုန်းအောင် ချုပ်ထားပါတယ်။ အဲ့ဒီအခါ ချုပ်ခေါင်းကဆင့် anchorage၊ အဲ့ဒီကနေ ကွန်ကရစ်ပေါ်ကို အားသက်ရောက်စေပါတယ်။ မြင်သာအောင် ဥပမာပေးရရင် မြေကြီးထဲမှာ မြုပ်နေတဲ့ ကြိုးတစ်စကို လက်နဲ့ဆွဲထုတ်တဲ့ ပုံစံကို မြင်ကြည့်ပါ။ ကြိုးကို လက်နဲ့ မြဲအောင် ကိုင်ထားပြီး ဆွဲထုတ်တဲ့အခါ မြေကြီးခြေကန်ဆွဲတော့ မြေကြီးကို ခြေထောက်ကနေ ဖိအားသက်ရောက်စေပါတယ်။ ဒီပုံစံပါပဲ PT ကြိုးတွေကို Jack နဲ့ ဆွဲတဲ့အခါ ကြိုးထိပ်မှာ တပ်ထားတဲ့ ချုပ်ခေါင်းတွေနဲ့ အိမ်လေးဟာလည်း ကွန်ကရစ်ပေါ်ကို ဖိအားတွေ သက်ရောက်စေတာပါ။ အဲ့ဒီအားတွေကပဲ ကွန်ကရစ်ကို အရမ်း strong ဖြစ်သွားစေပြီးတော့ အက်ကြောင်းဖြစ်နိုင်မှု အနည်းဆုံးဖြစ်စေတာပါ။
၅။ တပ်ဆင်၊ တည်ဆောက်ခြင်း
အဆောက်အဦးနဲ့ slab-on-ground တည်ဆောက်ရေးတွေမှာ PT ကြိုး တွေကို အများအားဖြင့် လိုအပ်တဲ့ပုံစံ၊ အရှည်တွေကို စက်ရုံကနေ တစ်ခါတည်း ဖြတ်တောက်ပေးလိုက်ပါတယ်၊ ဆိုဒ်ထဲရောက်ရင် သူ့နေရာနဲ့သူ အဆင်သင့် တပ်ဆင်လိုက်ရုံပါပဲ။ တပ်ဆင်တဲ့နေရာမှာတော့ PT ဒီဇိုင်းအရ ဘယ်နေရာထားရမယ်၊ ဘယ်နှချောင်းထည့်ရမယ်၊ တစ်ခုနဲ့တစ်ခု ဘယ်လောက်ခြားရမယ်၊ နောက်ပြီး formwork ကနေ ဘယ်နေရာမှာ အနိမ့်ဖြစ်ပြီး ဘယ်နေရာမှာ အမြင့် ဖြစ်ရမယ်၊ ဘယ်နေရာမှာ ကွေ့မယ်၊ ဝိုက်မယ် စတာတွေကိုတော့ installation drawing ကြည့်ပြီး သတ်မှတ်တဲ့အတိုင်း ထည့်ထား၊ တပ်ဆင်ရပါတယ်။ လိုအပ်တဲ့ rebar တွေလည်း ထည့်ပြီးရင်၊ PT ကြိုးတွေလည်း ထည့်ပြီးပြီဆိုရင် အားလုံးကို နေရာချထားမှု မှန်မမှန် စစ်ဆေးပြီး ကွန်ကရစ်လောင်းလိုက်ပါတယ်။ လောင်းပြီးရင် ပုံမှန်အတိုင်းပဲ အသားသေအောင် curing ပေးပါမယ်။ ကွန်ကရစ်ရဲ့ လိုအပ်တဲ့ ခံနိုင်အား (minimum compressive strength 3000-3500 psi) (မှတ်ချက်။ ။ PT သတ်မှတ်ချက်အရ minimum 3000-3500 psi ဆိုသော်လည်း လက်တွေ့တွင် အနည်းဆုံး 4500-5000 psi ခန့်ရမှဆွဲကြပါသည်) ရတဲ့အခါ PT ကြိုးတွေမှာ ချုပ်ခေါင်းလေးတွေတပ်ပြီး Jack နဲ့ ဆွဲဆန့်ပါတယ်။ ဆွဲဆန့်တဲ့အခါမှာလည်း အထက်က ပြောခဲ့သလို ကြိုးတွေက အနည်းငယ်ပြန်ရုန်းတော့ ချုပ်ခေါင်းကချုပ်ပါတယ်၊ ဒါပေမယ့် ကြိုးဟာ permanently stressed (elongated) ဖြစ်သွားတဲ့အခါ ကွန်ကရစ်ပေါ်မှာ ဖိအားသက်ရောက်စေပါတယ်။ အဲ့ဒီဖြစ်လာတဲ့ သက်ရောက်အားကပဲ ကွန်ကရစ်ပေါ်မှာ ကျမယ့် ကားတွေ၊ လူတွေ စတဲ့ load တွေကို ပြန်ထမ်းတာပါ။ ဒီလို ဆွဲဆန့်ထားခြင်းဟာ ကွန်ကရစ်ရဲ့ load ထမ်းနိုင်မှုကို သိသိသာသာ တိုးသွားစေပါတယ်။
အဆောက်အဦးမှာ PT နဲ့ flat slab တည်ဆောက်ပုံကို အကြမ်းဖျင်း ပြန်ချုံ့ပြောရင် အရင်ဆုံး formwork ဆင်မယ်၊ ပြီးရင် လိုအပ်တဲ့ rebar တွေကို bottom layer အနေနဲ့ အရင်ခင်းမယ်။ bottom layer ဆိုတာ တိုင်နေရာတွေမှာ punching ခံနိုင်အောင်ထည့်တဲ့ bottom bar တွေပါမယ်။ Shear wall ပတ်ပတ်လည်တွေမှာ ခပ်စိပ်စိပ် ဇကာပါမယ်။ အခြား Slab တစ်ပြင်လုံးမှာတော့ အောက်ခံ ဇကာတွေထည့်ပါတယ်။ အောက်ခံဇကာဆိုတာကလည်း သာမန်အဆောက်အဦးတွေလို 100-150 mm spacing ဇကာလောက်မဟုတ်ဘူး၊ 400-450 mm (အတိအကျမဟုတ်) လောက်ကို ခြားပြီး ထည့်ပါတယ်။ Bottom အလွှာ ပြီးပြီဆို PT ကြိုးတွေနေရာချ၊ တပ်ဆင်ပါတယ်။ ပြီးရင် Top layer ပြန်ခင်းပါတယ်။ Top layer မှာ လည်း bottom လိုပဲ တိုင်နေရာမှာ punching ခံနိုင်အောင် top bar တွေ ထည့်မယ်၊ shear wall ပတ်လည်တွေမှာ ခပ်စိပ်စိပ် ဇာကာ အပေါ်လွှာထည့်မယ်။ slab တစ်ပြင်လုံးမှာတော့ beam လည်း မပါတဲ့အတွက် negative bar – layer လို့ ခေါ်တဲ့ အပေါ်လွှာ ထည့်စရာမလိုပါဘူး အချို့ ဒီဇိုင်းတွေမှာတော့ ထည့်ရပါတယ်။ PT ကြိုး အဆုံးတွေမှာ ရှိတဲ့ anchorage ခေါင်းလေးတွေကို ချုပ်ထိန်းတဲ့သဘောနဲ့ ထည့်တဲ့ beam လေးတွေ လိုက်ထည့်ပါတယ်။ အချို့အဆောက်အဦးတွေဆို floor-to-floor height မြင့်လို့ပဲ ဖြစ်ဖြစ်၊ design လိုအပ်ချက်အရပဲဖြစ်ဖြစ် slab အောက်ခြေ၊ တိုင်ပတ်လည်တွေမှာ drop panel လေးတွေထည့်ရပါတယ်။ နောက်ပြီး slab တစ်ပြင်လုံးကိုလည်း ပတ်လည် beam (perimeter beam) နဲ့ ပတ်ရပါတယ်။ ဒီဇိုင်း တစ်ခုခုနဲ့ တစ်ခုတော့ ပုံသေမဟုတ်ဘဲ အပြောင်းအလဲ ရှိနိုင်ပါတယ်။ အားလုံးပြီးရင် ကွန်ကရစ်လောင်း၊ လိုအပ်တဲ့ ကွန်ကရစ် ခံနိုင်အားရရင် (သာမန်အားဖြင့် လေးရက်ခန့်အကြာ - chemical ထည့်လျှင် ပိုမြန်နိုင်ပါသည်) ကြိုးတွေကို Hydraulic Jack နဲ့ဆွဲတင်းမယ်။ ပြီးရင် အပြင်က ကြိုးအစွန်းထွက်တွေကို ဖြတ်ပစ်မယ်၊ anchorage ခေါင်း အပေါက်ထဲကို cement mortar မဆလာ သိပ်လိုက်မယ်။ ပြီးရင် grouting ပိုက်လေးတွေကနေတဆင့် cementitious grouting မှုတ်လိုက်မယ်။ ဒါဆို PT လုပ်ငန်းစဉ် ပြီးပါပြီ။ အောက်ခံ formwork တွေကို သာမန်အဆောက်အဦးတွေမှာ အနည်းဆုံး နှစ်ပတ်လောက် ထားတတ်ပေမယ့် PT နည်းသုံးရင် လေးရက်လောက်အကြာ၊ ကြိုးတွေ ဆွဲဆန့်ပြီးရင် formwork ပြားတွေ၊ အထပ်သားတွေ ဖြုတ်လို့ရနိုင်ပါတယ်။ safety ဖြစ်အောင်လို့တော့ အောက်ခံထောက်တွေတော့ နောက်တစ်ထပ် လောင်းမပြီးမချင်း ထောက်ထားရပါတယ်။
PT ကြိုးများ တပ်ဆင်ပြီးသွားရင် ကွန်ကရစ်မလောင်းခင် formwork ပေါ်မှာ Tendon line များ တည်ရှိရာ နေရာပြဖို့ ကြိုးတွေအောက်ကနေ ဆေးများ သုတ်ရပါတယ်။ ဒီဆေးတွေက ကွန်ကရစ်လောင်းပြီးလို့ formwork ခွာတဲ့အခါ ကွန်ကရစ်မှာ ကပ်ကျန်ခဲ့ပြီး နောက်ပိုင်း M&E work တွေ၊ အုတ်စီတာတွေလုပ်ဖို့ slab ကို အပေါက်ဖောက်တဲ့အခါ PT ကြိုးတွေကို မထိအောင် ရှောင်ပြီး ဆောင်ရွက်နိုင်ရန် ဖြစ်ပါတယ်။
Post-Tensioning နည်းစနစ်က ဆိုဒ်ထဲမှာပဲ စိတ်ကြိုက်ပုံစံ formwork ဆင်ပြီး ကွန်ကရစ်လောင်းတော့ လိုချင်တဲ့ အကွေ့အဝိုက်တွေကို လိုသလို ပုံဖော်နိုင်တဲ့ အားသာချက် ရှိပါတယ်။ လက်ရာမြောက်လှတဲ့ တံတားပုံစံတွေ၊ အကွေ့အဝိုက်တွေနဲ့ ရှုပ်ထွေးလှတဲ့ ပုံပန်းသဏ္ဍန်တွေဟာ Post-tensioning ရဲ့ သင်္ကေတတွေလို့ပဲ သတ်မှတ်နိုင်ပါတယ်။
၆။ ယနေ့ခေတ်အခြေအနေ
Post-tensioning ရဲ့ အားသာချက်တွေ၊ ကောင်းကျိုးတွေကြောင့် နိုင်ငံတကာမှာ သူ့ကို အသုံးချလာတာ တစ်နေ့ထက်တစ်နေ့ ပိုမို များပြား၊ ကျယ်ပြန့်လာပါတယ်။ သိရသလောက်ဆို မြန်မာနိုင်ငံနဲ့ အနီးစပ်ဆုံး ဖြစ်တဲ့ ထိုင်းနိုင်ငံမှာတောင် ဒီနည်းကို သုံးလာတာ ဆယ်စုနှစ်ကျော် ရှိနေပြီလို့ ဆိုပါတယ်။ ဒီထက်လည်း ပိုနိုင်ပါတယ်။ အခြား စင်္ကာပူလို နိုင်ငံတွေ၊ အနောက်နိုင်ငံတွေမှာတော့ တော်တော် ကြာလို့ တော်တော်လည်း အသုံးများနေပါပြီ။ ကျွန်တော်တို့ မြန်မာမှာတော့ အရင် တံတားတွေလောက်ပဲ အသုံးများခဲ့ရာကနေ လက်ရှိတော့ အဆောက်အဦးအချို့မှာ အသုံးပြုလာကြပါပြီ။ သူ့နည်းပညာက သာမန်ထက်စာရင် ပိုပိုမြန်ဆန်၊ လွယ်ကူပြီး အကျိုးကျေးဇူးများတာကြောင့် ဒီထက်ဒီထက် ပိုမို ကျယ်ပြန့်လာပါပြီ။
ပြည်ပရောက်အင်ဂျင်နီယာများနဲ့ ဝါရင့်အင်ဂျင်နီယာများအနေနဲ့တော့ PT နဲ့ မစိမ်းကြပေမယ့် ကျွန်တော်တို့လို လူငယ်ပိုင်းတွေနဲ့ ကျောင်းဆင်းစ မျိုးဆက်သစ်အင်ဂျင်နီယာတွေ၊ လုပ်ငန်းခွင်ဝင် လူငယ်၊ လူလတ်ပိုင်းတွေအတွက် အနည်းငယ် စိမ်းနေကြသေးလို့ PT နဲ့ ပတ်သက်ပြီး ကျွန်တော့် အတွေ့အကြုံ ရှိသလောက်၊ သိထားသလောက် ဗဟုသုတအလို့ငှာ ပြန်လည် မျှဝေရခြင်းသာ ဖြစ်ပါတယ်။ အသေးစိတ် တပ်ဆင်၊ ဆောက်လုပ်ခြင်းနဲ့ ဒီဇိုင်းတွက်ချက်ခြင်းများကိုတော့ အင်တာနက်မှ ရှာဖွေလေ့လာကြဖို့နဲ့ လုပ်ငန်းခွင် အတွေ့အကြုံများထဲမှ ရှာဖွေသင်ယူနိုင်ကြဖို့ တိုက်တွန်းအပ်ပါတယ်။
မြန်မာ့အင်ဂျင်နီယာများ အများတကာနဲ့၊ နိုင်ငံတကာနဲ့ ရင်ဘောင်တန်း၍ ဆောင်ရွက်၊ လုပ်ကိုင် နိုင်ကြစေ . . . . .
အောင်မျိုးမင်း
မျိုးဆက်သစ်အင်ဂျင်နီယာ (YE-MES)
- - - - - - - - - - - - - - - - - - - - - - - - - - - - - - - - -
မှတ်ချက်။ ။ အထက်ပါ အကြောင်းအရာများမှာ POST-TENSIONING INSTITUTE (PTI) မှ ရေးသားသော "What is Post-Tensioning" ဆိုသော စာစုကို ကိုးကား၍ အတွေ့အကြုံနှင့်ပေါင်းစပ် ရေးသားဖော်ပြထားခြင်းသာ ဖြစ်ပါသည်။
နားလည် သဘောပေါက်လွယ်စေရန် အသုံးပြုထားသော ဓာတ်ပုံများမှာလည်း အင်တာနက်မှ ရှာဖွေ အသုံးပြုထားသော ပုံများဖြစ်သောကြောင့် သက်ဆိုင်ရာ ပုံများအတွက် credit ပေးပါသည်။
Photo are copied from www.images.google.com